«AMANAT» партиясының Сайлауалды бағдарламасы аясында, соңғы 3 жылда Түркістан облысында 255 млрд. теңгені құрайтын 81 инвестициялық жобаны іске асыру арқылы 5300-ден астам жұмыс орны ашылды. Осы кезең ішінде 87 мектеп, 23 фельдшерлік-акушерлік пункт пен амбулатория, 7 спорттық нысан, 2 оңалту орталығы салынды.

Партия ықпалымен 57 елді мекен орталықтандырылған таза ауыз сумен, 126 елді мекен табиғи газбен қамтылды. Негізгі жабдықтарының тозуы қауіпті деңгейге жеткен  №5 Кентау жылу энергоорталығы толығымен модернизациядан өтіп, пайдалануға берілді.

Жол құрылысы саласында жергілікті маңызы бар 773 шақырымнан астам жол күрделі жөндеуден өтті. Ұзындығы 24 шақырымды құрайтын Түркістан-Кентау бағытындағы автомобиль жолы толықтай жаңартылды. Түркістан-Шәуілдір автомобиль жолын реконструкциялаудың І және ІІ кезеңдері аяқталды.

Сондай-ақ партияның кешенді жоспарында қамтылған Түркістандағы «Ана мен бала» орталығының, Сарыағаштағы көпбейінді аурухананың және облыстың оңтүстік аудандары үшін стратегиялық маңызға ие ұзындығы 102 шақырымдық Сарыағаш айналма жолының құрылыстары басталды.

Осы мазмұндағы атқарылған және қолға алынған жұмыстар партияның өз міндеттемелеріне жауапкершілікпен қарайтынын айқын көрсетті. Жалпы, 2023-2027 жылдар аралығындағы кезеңде, өңірлік Жол картасына 136 индикаторлық көрсеткіш пен 568 іс-шара енгізілді. Осы жоспар қабылданған үш жыл ішінде межелі көрсеткіштердің 61  пайызы немесе 344 іс-шара толығымен орындалды.

Ағымдағы жылға жоспарланған 108 іс-шараның орындалуы бақылауға алынды. Облыс аумағында партияның ерекше қадағалауында тұрған және бюджет есебінен салынып жатқан 31 әлеуметтік маңызы бар нысанда партиялық бақылау бекеттері қойылып, құрылыстың барлық кезеңдеріне қадағалау күшейтілді.

Түркістан облысы халқының 75 пайызы ауылдық аумақтарда тұратынын ескерсек, өңірдегі әлеуметтік-экономикалық саясаттың өзегі – ауылды дамыту екені айқын. Осы ерекшелікке сәйкес, «AMANAT» партиясының ауылға бағдарланған жобалары облыс тұрғындарының жаппай қолдауына ие болды. Осы ретте  «Ауыл аманаты» жобасы аясында соңғы үш жылда республикалық бюджеттен 30,2 млрд. теңгеге 3 790 жоба қаржыландырылып, 4 600-ден астам жаңа жұмыс орындары ашылды.

Сонымен қатар «Жер аманаты» жобасы арқылы пайдаланылмай жатқан ауыл шаруашылығы жерлерін мемлекет меншігіне қайтару және оны тиімді айналымға енгізу жұмыстары қарқын алды. Жоба аясында  2022-2025 жылдар аралығында 1,8 млн. га. жер мемлекет меншігіне қайтарылса, оның 950 мың гектары қайта айналымға енгізілді. Партия бастамасының игілігін облыстағы 312 елді мекеннің тұрғындары көрді. Биыл 41 мың гектар жерді қайтару жоспарланса, бүгінгі күнге дейін нақты 10 мың гектар жер мемлекет меншігіне қайтарылды.

«AMANAT» партиясы Түркістан облыстық филиалының баспасөз қызметі

QULAGER.KZ. 2026 жылғы жол-құрылыс маусымы басталғалы бері Қазақстанда республикалық маңызы бар автомобиль жолдарын күрделі жəне орташа жөндеу жұмыстары қарқынды жүргізіліп жатыр. Биылғы маусымның басты ерекшелігі – жол төсемінің негізінен бастап үстіңгі қабатына дейінгі конструктивті қабаттарды кезең-кезеңімен төсеуге баса мəн берілуінде. Бұл болашақ автожолдардың сапасы мен ұзақ жылдар бойы шыдас беруінің басты кепілі болмақ, деп хабарлайды ҚР Көлік министрлігі.

2026 жылы күрделі жөндеу аясында 25 нысан бойынша жалпы 321 км автомобиль жолдары қамтылды, олардың 19-ы өткен жылдан өтпелі, ал алтауы – жаңа нысандар. Маусым басынан бері негізгі жұмыстар жол жамылғысының конструктивтік қабаттарын салуға шоғырланған.

Жоспарланып, орындалған жұмыстар аясында 231 км-де негіздің төменгі қабаты, 190 км-де негіздің жоғарғы қабаты, 230 км-де жабынның төменгі қабаты және 78 км-де жабынның жоғарғы қабаты салу жұмыстары атқарылып жатыр.

Сонымен қатар ағымдағы жылы 124 нысан құрамында 69 өтпелі және 55 жаңа учаскені қамтитын жалпы 3,7 мың км автомобиль жолдарында орташа жөндеу жұмыстары жалғасады.

Бұл жұмыстар шеңберінде де негізгі көлем жол жамылғысының конструктивтік қабаттарын салуға тиесілі: маусым басынан бері жоспарланып, негіз қабатын салу жұмыстары жүргізілуде – 1,1 мың км-де, жабынның төменгі қабаты – 1,8 мың км-де, ал жабынның жоғарғы қабаты – 2,4 мың км-де орындалуда.

QULAGER.KZ. Қазақстанда жазғы демалыс және мектеп каникулы кезеңінде көлік қатынасының қолжетімділігін арттыру бойынша қосымша шаралар қабылдануда. Жолаушылар сұранысының артуына байланысты сұранысқа ие туристік бағыттар бойынша теміржол маршруттары мен әуе рейстерінің саны артады, деп хабарлайды ҚР Көлік министрлігі.

Теміржол тасымалы

2026 жылдың жазғы маусымында 15 қосымша теміржол маршруты ұйымдастырылады. Қосымша пойыздар 2026 жылғы 16 маусымнан бастап қатынай бастайды.

Бағыттар қатарында Астана, Алматы, Қарағанды, Ақтөбе, Семей, Өскемен, Қызылорда және Павлодар қалаларынан Достық пен Балқаш секілді туристік және курорттық аймақтарға қатынайтын пойыздар бар.

Аталған шаралар жазғы кезеңде пойыздарда шамамен 550 мың қосымша орын ашуға мүмкіндік береді.

Сонымен қатар, жолаушылар ағынының артуына қарай қолданыстағы пойыз құрамдары кезең-кезеңімен ұлғайтылады. Жазғы маусымда пойыз құрамдары орта есеппен 19–21 вагонға дейін көбейеді. Ал маусымаралық кезеңде бұл көрсеткіш 13–15 вагонды құрайды.

Сондай-ақ 2026 жылғы 1 маусымнан бастап Қарағанды – Балқаш бағыты бойынша №219/220 жолаушылар пойызы іске қосылады.

Әуе тасымалы

2026 жылдың маусым-тамыз айлары аралығында Астана – Балқаш, Үржар, Үшарал және Алматы – Балқаш, Үржар, Үшарал бағыттары бойынша аптасына 7 рейске дейін қосымша әуе рейстері ашылады.

Аталған бағыттар бойынша әуе билеттерінің құны әлеуметтік қолжетімді деңгейде сақталады – 16 мыңнан 20 мың теңгеге дейін. Бұл көптеген отбасыларға еліміздің туристік аймақтарында жазғы демалысты қолжетімді ұйымдастыруға мүмкіндік береді.

Жалпы, 2026 жылы Қазақстанда аптасына 813 рейс жиілігімен 60 ішкі әуе бағыты бойынша тұрақты рейстер орындалады.

Тұрақты әуе маршруттарын субсидиялау бағдарламасы аясында 24 бағытты, оның ішінде 16 туристік бағытты қолдауға 6,4 млрд теңге көлемінде қаржы қарастырылған.

Қабылданып жатқан шаралар ішкі туризмді дамытуға, өңірлердің көлік қолжетімділігін арттыруға және жазғы демалыс кезеңінде азаматтардың жайлы әрі қауіпсіз сапар жасауына қосымша мүмкіндік береді.

«Қазгидромет» синоптиктері 28 — 30 мамыр аралығында еліміздің 17 өңірінде дауылды ескерту жариялады, деп хабарлайды QULAGER.KZ.

Ел аумағында ауа райы құбылмалы болады деп күтілуде: жаңбыр жауып, найзағай ойнайды, екпінді жел соғады, кей жерлерде бұршақ пен шаңды дауыл болуы мүмкін.

Жетісу облысының шығысында және таулы аудандарында жаңбыр жауып, найзағай болады. Кей жерлерде нөсер жаңбыр, бұршақ және дауыл күтіледі. Жел екпіні секундына 23–28 метрге дейін жетеді. Өңірде жоғары және төтенше өрт қаупі сақталады. Талдықорғанда жоғары өрт қаупі бар.

Ақтөбе облысында жаңбыр жауып, найзағай болады. Кей жерлерде нөсер, бұршақ және екпінді жел күтіледі. Желдің жылдамдығы 23 м/с-қа дейін жетеді. Бірқатар аудандарда жоғары және төтенше өрт қаупі сақталады. Ақтөбеде жаңбыр жауып, найзағай болады, жел екпіні 20 м/с-қа дейін күшейеді.

Алматы облысында және Алматы қаласында жаңбыр, найзағай, кей жерлерде қатты жауын-шашын, бұршақ және дауыл күтіледі. Жел екпіні 25 м/с-қа дейін жетеді. Алматыда кешке қарай қатты жаңбыр жаууы мүмкін. Қонаевта жаңбыр мен найзағай болады, жел екпіні 20 м/с-қа дейін күшейеді.

Маңғыстау облысында жаңбыр жауып, найзағай болады, кей жерлерде шаңды дауыл күтіледі. Жел екпіні 28 м/с-қа дейін жетеді. Ақтауда жаңбыр жауып, найзағай болады, жел 20 м/с-қа дейін күшейеді.

Шығыс Қазақстан және Абай облыстарында кей жерлерде жаңбыр жауып, найзағай болады. Жел екпіні 20 м/с-қа дейін жетеді. Өңірлерде жоғары және төтенше өрт қаупі сақталады. Семейде жоғары өрт қаупі бар.

Астанада қысқа мерзімді жаңбыр жауып, найзағай болады. Жел екпіні 20 м/с-қа дейін жетеді.

Атырау облысында жаңбыр, найзағай, кей жерлерде қатты жауын-шашын, бұршақ және дауыл күтіледі. Жел екпіні 28 м/с-қа дейін күшейеді. Өңірде жоғары және төтенше өрт қаупі сақталады. Атырауда жаңбыр жауып, найзағай болады, жел 20 м/с-қа дейін жетеді.

Ұлытау облысында жаңбыр жауып, найзағай болады. Кей жерлерде нөсер, бұршақ және дауыл күтіледі. Жел екпіні 20 м/с-қа дейін жетеді. Өңірде жоғары және төтенше өрт қаупі сақталады. Жезқазғанда найзағай ойнап, кей жерлерде бұршақ пен дауыл болуы мүмкін.

Қызылорда облысында жаңбыр, найзағай, шаңды дауыл, бұршақ және екпінді жел күтіледі. Желдің жылдамдығы 23 м/с-қа дейін жетеді. Қызылордада найзағай ойнап, дауылды жел соғады.

Жамбыл облысында жаңбыр жауып, найзағай болады. Кей жерлерде қатты жауын-шашын, бұршақ және дауыл күтіледі. Жел екпіні 28 м/с-қа дейін күшейеді. Таразда найзағай ойнап, қатты жел соғады.

Қарағанды облысында кей жерлерде жаңбыр жауып, найзағай, бұршақ және дауыл болуы мүмкін. Қарағандыда қысқа мерзімді жаңбыр мен найзағай күтіледі.

Қостанай облысында жаңбыр жауып, найзағай болады. Кей жерлерде бұршақ пен дауыл күтіледі. Жел екпіні 20 м/с-қа дейін жетеді. Қостанайда жаңбыр мен найзағай болады.

Түркістан облысында және Шымкент қаласында жаңбыр жауып, найзағай болады. Кей жерлерде нөсер жаңбыр, бұршақ және дауыл күтіледі. Жел екпіні 28 м/с-қа дейін жетеді. Өңірде төтенше өрт қаупі сақталады.

Батыс Қазақстан облысында жаңбыр жауып, найзағай болады. Кей жерлерде бұршақ пен дауыл күтіледі. Оралда жаңбыр мен найзағай болады.

Ақмола облысында жаңбыр жауып, найзағай болады. Кей жерлерде бұршақ күтіледі. Жел екпіні 20 м/с-қа дейін жетеді. Көкшетауда қысқа мерзімді жаңбыр мен найзағай болады.

Синоптиктер күрделі ауа райы жағдайларына байланысты сақтық шараларын сақтауға шақырады.

Түркістан облысында мерзімді әскери қызметшілер штаттық қарудан алғашқы практикалық атыстарын өткізді, деп хабарлайды QULAGER.KZ.

Түркістан облысындағы «Дарбаза» оқу полигонында «Оңтүстік» өңірлік қолбасшылығына қарасты 35748 әскери бөлімінің мерзімді әскери қызметшілері штаттық қарудан алғашқы практикалық атыстарын өткізді.

Осы көктемде Алматы, Қызылорда, Жамбыл және Маңғыстау облыстарынан шақырылған жас сарбаздар әскери ант қабылдамағанымен, бастапқы жалпыәскери дайындық курсынан өтіп үлгерді. Жас буын қарудың тактикалық-техникалық сипаттамаларын, оны қолдану тәртібін, қауіпсіздік талаптарын және бақылау атыстарын орындау ережелерін меңгерді.

Тәжірибелік сабақтар тәжірибелі нұсқаушылар мен бөлімше командирлерінің жетекшілігімен өткізілді. Атыс жаттығуының негізгі мақсаты – мергендік дағдыларын, дұрыс көздеуді және жауынгерлік қарумен сенімді жұмыс істеуді қалыптастыру.

Полигонда ұйымдастырылған сабақтар әскери қызметшілерді даярлаудың бірнеше кезеңін қамтып, алдағы қызметті сапалы атқаруға қажетті базалық машықтарды қалыптастыруға бағытталған.

Жас сарбаздардың басым бөлігі үшін бұл автоматтан алғаш рет оқ ату тәжірибесі болды. Толқынысқа қарамастан, көптеген әскери қызметшілер жақсы нәтиже көрсетіп, командирлердің оң бағасына ие болды.

— Автоматты алғаш рет қолына алған сарбаздардың көбі жақсы нәтиже көрсетті. Қазірдің өзінде олардың бойынан Отанның сенімді қорғаушысы болуға деген әлеует байқалады, — деді мотоатқыштар батальонының командирі майор Бексұлтан Шүкірқалиев.

Өз әсерімен Әлібек Ұзақбаев та бөлісті. Маңғыстау облысынан шақырылған сарбаздың айтуынша:

— «Өз нысаналарыңнан, Атыңдар!» пәрменінен кейін біз үйретілгендей көздеп, шүріппені баяу бастық. Алғашқы секундтарда толқу, қарудың тебуі мен құлақтағы шу сезілді. Бірақ кейін өз-өзіме деген сенімділік пайда болды. Бұл мен үшін әскери істі меңгерудегі маңызды кезең әрі төзімділікке сын болды.

Бөлімше командирлері жас сарбаздардың әскери іске деген қызығушылығы жоғары екенін және кәсіби дағдыларын жетілдіруге ұмтылысын атап өтуде. Алдағы уақытта жас жауынгерлер әскери ант қабылдап, жауынгерлік дайындық бағдарламасы бойынша оқуын жалғастырады.