Түркістан қаласы аумағындағы қараусыз қалған ғимараттар мәселесі қаралды, деп хабарлайды QULAGER.KZ.

Түркістан қаласы аумағындағы қараусыз қалған ғимараттардың жай-күйі мен атқарылып жатқан жұмыстар бойынша лездемелік мәжіліс өтті.

Қала басшысы Әзімбек Пазылбекұлы осыған дейін мемлекеттік құзырлы органдардың қатысуымен арнайы жиын өткізіп, жұмысшы топ құрған болатын. Бүгінде зерделеу жұмыстары нәтижесінде қала аумағында жалпы 70 қараусыз қалған нысан анықталған. Аталған ғимараттардың 12-сі жойылып, қалған ғимараттардың иелерімен ретке келтіру немесе сүру бағытында жұмыс атқарылуда.

Қала әкімі аталған жағдайға байланысты бірқатар сын-ескертулер айтып, орындалмаған нысандардың қауіпсіздік деңгейіне ерекше назар аударуды, 20 желтоқсанға дейін толық ретке келтіруді тапсырды. Әсіресе, балалар мен тұрғындардың өмірі мен қауіпсіздігіне төнуі мүмкін қатерлердің алдын алу қажеттігін атап өтті.

Сонымен қатар, мәжілісте түнгі жарықтандыру жоқ көшелер мәселесі де қозғалды. Қала аумағында анықталған 38 көшенің 27-сінде жарықтандыру жұмыстары аяқталған. Ал қалған 11 көшеде жұмыстар әлі де жалғасуда. Қала әкімі коммуналдық шаруашылық бөліміне жарықтандыруды толық іске қосуды, адам өмірі мен қауіпсіздігіне аса жауапкершілікпен қарауды, уақытылы орындамаған жауапты тұлғаларға қатаң шара көруді тапсырды.

Жетісай ауданының әкімі мәжілісте нақты тапсырмалар берді, деп хабарлайды QULAGER.KZ.

Жетісай ауданының әкімі Серік Үсенұлы Мамытовтың төрағалығымен өткен аппарат мәжілісіне аудан әкімінің орынбасарлары мен аудандық полиция бөлімінің басшысы Мұрат Ермеков, аудандық аумақтық кірістер басқармасының басшысы Серік Жасұзақов пен білім бөлімі басшысының міндетін уақытша атқарушы Шоқан Адайбеков, қала, кент, ауылдық округ әкімдері мен бөлім басшылары, «ҚазСуШар» РМК Түркістан өндірістік филиалы мен төтенше жағдайлар бөлімінің өкілдері қатысты.

Күн тәртібінде бекітілген мәселелер бойынша жауын-шашын салдарынан көшелерді су басуының алдын алу жұмыстары туралы Жетісай қаласының әкімі Нұрлыбек Бахтияров пен Асықата кентінің әкімі Нұралы Жолдасбек, аудандық төтенше жағдайлар бөлімінің бас маманы Қанжар Досаев баяндама жасаса, аудандық экономика және қаржы бөлімінің басшысы Өмірзақ Дүйсебаев пен аудандық аумақтық кірістер басқармасының басшысы Серік Жасұзақов қаржылардың игерілуі мен бюджеттік түсімдердің орындалуына тоқталды.

Сонымен қатар, мәжіліс барысында қысқы вегетациялық жұмыстардың атқарылуы мен әскерге шақырудың барысы туралы, «Таза Қазақстан» жалпыхалықтық экологиялық шарасының атқарылуы мен жылыту маусымының барысы туралы, ауыл шаруашылығы саласында су үнемдеу технологиясын ендіру бойынша атқарылып жатқан жұмыстар жайлы тиісті сала басшылары баяндама жасап, алдағы атқарылар жұмыстардың жоспарымен таныстырды. Қойылған сұрақтарға жауап берді.

Мәжіліс соңында аудан басшысы атқарылған жұмыстар мен алдағы жоспарларға баға беріп, орын алған кемшіліктерді жою бойынша нақты ұсыныстар айтты. Әр сала бойынша уақыт белгілеп, олқылықтарды жоюды тапсырды.

Қазақстан Республикасы Денсаулық сақтау министрінің бірінші вице-министрі Түркістан облысына жұмыс сапарымен келді, деп хабарлайды QULAGER.KZ.

Қазақстан Республикасы Денсаулық сақтау министрінің бірінші вице-министрі Тимур Сұлтанғазиев Сламжанович Түркістан облысына жұмыс сапарымен келіп, Кентау қаласында болды.

Сапар барысында вице-министр алдымен Түркістан облысы денсаулық сақтау басқармасына қарасты «Кентау орталық қалалық ауруханасы» ШЖҚ МКК-ның жұмысымен танысты. Бүгінгі таңда аурухана заманауи медициналық құрылғылармен толықтырылып, науқастардың сауығу үдерісін жеделдету және медициналық көмектің сапасын арттыру мақсатында жаңа лапароскопиялық жүйелер, видеоэндоскоптар және ультрадыбыстық зерттеу (УДЗ) аппараттары сатып алынған.

Сонымен қатар аурухананың А1 корпусында күрделі жөндеу жұмыстары жүргізілуде. Негізгі мақсат — ота жасау бөлмелерін «таза аймаққа» (clean room, таза бөлмелер кешені) айналдыру арқылы хирургиялық көмектің қауіпсіздігін арттырып, халыққа сапалы медициналық қызмет көрсету.

Одан кейін бірінші вице-министр Кентау қалалық емханасының жұмысымен танысып, қабылдау бөлімінен бастап барлық құрылымдық бөлімшелердің қызметін қарап шықты. Емхананың жұмысын оң бағалады.

Сондай-ақ Кентау қаласы әкімдігінде денсаулық сақтау мәселелері бойынша тұрғындармен кездесу өтті. Кездесуден кейін вице-министрдің жеке қабылдауы ұйымдастырылып, қабылдауға шамамен 20 азамат келді. Жеке қабылдау барысында тұрғындар жұмысқа орналасу, міндетті әлеуметтік медициналық сақтандыру (МӘМС), денсаулық жағдайы және медициналық ұйымдардың жұмысына қатысты мәселелерді көтерді. Барлық өтініштер тыңдалып, жауапты басшыларға нақты тапсырмалар берілді.

Жұмыс сапарының қорытындысы бойынша Тимур Сұлтанғазиев Кентау қаласындағы денсаулық сақтау саласында атқарылып жатқан жұмыстарға оң баға беріп, медициналық қызмет сапасын одан әрі арттыруға бағытталған ұсыныстарын айтты.

QULAGER.KZ. Қасым-Жомарт Тоқаев Komatsu компаниясы директорлар кеңесінің төрағасы Хироюки Огаваны қабылдады, деп хабарлайды Ақорда.

Кездесуде Мемлекет басшысы Komatsu компаниясы еліміздің тау-кен инфрақұрылымын дамытуға елеулі үлес қосып келе жатқан сенімді әрі уақыт тезінен өткен серіктесі саналатынын атап өтті.

Президент компанияның Астана қаласында техникаларды күрделі жөндеуге және қайта қалпына келтіруге арналған өндірістік кешен салу туралы шешімін құптады.

Хироюки Огава стратегиялық тұрғыдан маңызды нарық саналатын Орталық Азияның әлеуеті жоғары, мүмкіндігі мол екеніне тоқталды. Ол жаңа кешеннің аймақтағы тау-кен компанияларының техникаларын аз уақыт ішінде төмен бағада жөндейтін әрі оларға жедел сервистік қызмет көрсететін өңірдегі ірі хабқа айналатынын мәлімдеді.

Мемлекет басшысының айтуынша, Қазақстан өндірісті локализациялауға, елдер арасындағы өнеркәсіптік ынтымақтастықты одан әрі нығайтуға, ұлттық экономиканың бәсекеге қабілеттілігін арттыру үшін озық технологиялар алуға ниетті.

Кездесу барысында маман даярлау мәселесіне баса мән берілді.

Қасым-Жомарт Тоқаев Komatsu компаниясының елімізде операторларға, механиктер мен инженерлерге арналған аймақтық оқыту орталығын ашу туралы бастамасына қолдау білдірді. Сондай-ақ бұл жобаның адами капиталды дамытуға, өнеркәсіптік серіктестікті тереңдетуге зор үлес қосатынын айтты.

Komatsu құрылыс, тау-кен, жол және индустрия салаларына қажетті техникалар өндіруге маманданған әлемдегі ең ірі машина жасау корпорацияларының бірі саналады.

QULAGER.KZ. Президент Токионың Төтенше жағдайлар жөніндегі ахуалдық орталығын аралап көрді, деп хабарлайды Ақорда.

Бұл азаматтық қорғаныс пен қаладағы қауіп-қатерлердің алдын алудың негізгі жүйесі саналады.

Орталықтың басты міндеті – қаладағы ахуалға ұдайы мониторинг жүргізу, төтенше жағдай кезінде билік органдарының іс-әрекетін үйлестіру, ықтимал қатер мен орын алған апаттар (жер сілкінісі, тайфун, су тасқыны, ірі техногендік апаттар, лаңкестік актілер) туралы ақпараттарды талдау.

БАҚ пен әлеуметтік желілердегі жалған ақпараттың таралуына қарсы іс-қимылға баса көңіл бөлінеді. Бұл жұмыспен тәулік бойы мониторинг жүргізетін арнайы бөлімше шұғылданады.

Ал күнделікті өмірде кешен дағдарыс жағдайларын басқару жүйелерін жоспарлау және жетілдіру, азаматтық қорғаныстың өңірлік жоспарын әзірлеу, оқу-жаттығу жиындарын дайындау және өткізу, халықты құлақтандыруға, апаттардың салдарын жоюға арналған ақпараттық жүйелерді дамыту ісімен айналысады.