Сарыағаш ауданының әкімі тұрғындарды жеке мәселелері бойынша қабылдады, деп хабарлайды QULAGER.KZ.

Сарыағаш ауданының әкімі Арман Абдуллаев кезекті рет жеке қабылдау өткізіп, ауданның 19 тұрғынын қабылдады. Кезектілік тәртібімен ұйымдастырылған қабылдауға аудан әкімінің орынбасарлары мен дербес бөлім басшылары қатысып, азаматтардың өтініштері мен ұсыныстарын жан-жақты қарастырды.

Қабылдау барысында тұрғындар әлеуметтік сала, тұрғын үй, инфрақұрылым және өзге де жеке мәселелер бойынша өтініштерін жеткізді. Аудан әкімі алдымен ғимараттың бірінші қабатына түсіп, тұрғындармен тікелей жүздесіп, олардың талап-тілектерін мұқият тыңдады.

– Біздің басты мақсатымыз – қабылдауға келген азаматтардың өтініштері мен ұсыныстарын заң аясында қарап, мүмкіндігінше оң шешілуіне ықпал ету. Әрбір мәселе заң талаптарына сәйкес қарастырылуы тиіс, – деді аудан әкімі Арман Абдуллаев.

Қабылдау барысында бірқатар тұрғындарға заң талаптарына сәйкес түсіндіру жұмыстары жүргізілсе, кейбір мәселелерді шешу мақсатында тиісті бөлім басшыларына нақты тапсырмалар жүктелді. Сонымен қатар аудан басшысы әрбір өтініш бақылауда болатынын және тұрғындардың мәселелері назардан тыс қалмайтынын атап өтті.

Айта кетейік, аудан әкімінің жеке қабылдауына жазылуды Сарыағаш ауданы әкімі аппаратының жалпы және әкімшілік бөлімі жүзеге асырады. Қабылдауға eGov.kz порталы, e-Otinish бірыңғай платформасы арқылы немесе аудан әкімдігіне жазбаша өтініш беру арқылы жазылуға болады.

Қазығұрт ауданында мектеп түлектеріне және жалпы қоғамдық қауіпсіздікке қатысты шаралар күшейтіледі, деп хабарлайды QULAGER.KZ.

Қазығұрт ауданында қоғамдық-саяси ахуалды тұрақтандыру, өзекті мәселелерге дер кезінде назар аудару, келеңсіз жайттардың алдын алу – қашанда басты назарда. Осыған орай, бүгін Қазығұрт ауданының әкімі Азизхан Исмаилов пен аудан прокуроры Руслан Абдраимовтың төрағалығымен лездемелік мәжіліс өтті.

Жиынға аудан әкімінің орынбасары Мақсат Беркінбай, аппарат басшысы Қанат Иматов, аудандық полиция бөлімі басшысының орынбасары Нұрлыбек Нарбаев, аудандық төтенше жағдайлар бөлімінің басшысы Дінмұхаммед Тәліпбаев, аудандық білім бөлімі басшысының м.у.а. Ғалымжан Омартай және мектеп директорлары, құқық қорғау органдары мен білім бөлімінің қызметкерлері қатысты.

Жиын барысында аудан әкімі Азизхан Әзімханұлы 25 мамыр күні оқушылар тарапынан автокортеждер, көлік шеруі және өзге де рұқсат етілмеген іс-шаралардың алдын алу үшін рейдтік, түсіндіру және патрульдік бақылауды күшейтуді тапсырды. Сонымен қатар бітіру іс-шаралары өтетін білім беру ұйымдарының маңындағы қоғамдық тәртіпті қамтамасыз ету, балалар мен тұрғындар көп шоғырланатын демалыс орындарында қауіпсіздік рейдтері мен кезекшіліктерді күшейтуді жүктеді. Сондай-ақ мейрамханаларда, кафелерде, демалыс аймақтарында және табиғат аясында мектеп бітіруге қатысты іс-шараларын өткізуге тыйым салынады. Аттестат пен диплом тапсыру рәсімдері тек білім беру ұйымдарының қабырғасында ұйымдастырылады.

Штаб отырысында аудан прокуроры Руслан Әлжанұлы мектеп бітірушілердің қатысуымен өтетін іс-шаралар кезіндегі қоғамдық қауіпсіздік пен құқықтық тәртіпті күшейту мәселелері талқыланды. Аудан аумағында мектеп бітіру кештерін, банкеттерді, автокортеждер ұйымдастыруға жол берілмейтіні атап өтілді. Жауапты өкілдер мен құзырлы орган тарапынан алгоритмге сәйкес, жұмыс жүргізу, қоғамдық-саяси ахуалды бақылауда ұстап, тиісті шараларды қабылдау тапсырылды.

Айта кетейік, қазіргі таңда Қазығұрт ауданында 79 мектепте 32 141 оқушы білім алуда. Оның ішінде аудандық білім бөліміне қарасты 71 мемлекеттік мектепте – 31 383 оқушы, 5 жекеменшік мектепте – 858 оқушы оқиды. Биыл 9-сыныпты – 2680 оқушы, 11-сыныпты – 2003 түлек аяқтайды. Қазығұрт ауданы бойынша 11-сынып бітірушілері арасында “Алтын белгі” үміткерлер саны — 105 оқушыны, ал үздік атестатқа үміткерлер саны — 161 оқушыны құрайды.

Қазығұрт ауданының әкімі Азизхан Исмаилов “AMANAT” партиясының ғимаратында тұрғындармен жеке кездесіп, қоғамдық қабылдау өткізді, деп хабарлайды QULAGER.KZ.

Аудан әкімі Азизхан Әзімханұлы тұрғындардың талап-тілектерін тыңдап, елді мекендердегі өзекті мәселелерді назарға алды. Қабылдауға келген азаматтар аудан көлемінде атқарылып жатқан жұмыстарға ризашылықтарын білдіріп, бірқатар маңызды ұсыныстарын жеткізді.

Кездесу барысында тұрғындар ең алдымен «Қазақ аналары – дәстүрге жол» республикалық қоғамдық бірлестігінің бастамасымен ұйымдастырылған «Жеті қазына – ұлт рухы» атты рухани-танымдық іс-шараның жоғары деңгейде өткенін ерекше атап өтті. Ауқымды шара ұлттық құндылықтарды дәріптеп, салт-дәстүр мен ұрпақ тәрбиесінің маңызын кеңінен насихаттауға зор ықпал еткені айтылды. Сонымен қатар, іс-шараның мазмұнды әрі тағылымды өтуіне аудан әкімдігі тарапынан жан-жақты қолдау көрсеткені үшін шынайы алғысын білдірді.

Қоғамдық қабылдау барысында елді мекендердегі инфрақұрылым мәселелері де кеңінен көтерілді. Тұрғындар жол сапасын жақсарту, ауылішілік көшелерді жөндеу, жарықтандыру және газдандыру жұмыстарын жандандыру қажеттігін айтты. Әсіресе Қаржан ауылының тұрғындары жол, жарық және газ мәселелерінің халық тұрмысына тікелей әсер ететінін атап өтті.

Кездесуде қоршаған ортаны қорғау және тұрмыстық қалдықтарды тиімді басқару мәселелері де сөз болды. Тұрғындар қоқысты қайта өңдеу жұмыстарын жүйелі жолға қойып, тазалық мәдениетін қалыптастыру бағытында нақты шаралар қабылдаудың маңыздылығына тоқталып, ұсыныстарын ортаға салды.

Ауыз сумен қамту мәселесі де қоғамдық қабылдаудың негізгі тақырыптарының бірі болды. Тұрғындар сапалы ауыз сумен қамтамасыз ету халық денсаулығы мен өмір сапасының басты кепілі екенін айтып, бұл бағыттағы жұмыстарды күшейтуді сұрады.

Қабылдауда көтерілген тағы бір маңызды мәселе – Қақпақ ауыл округіндегі жайылым жер тапшылығы. Мал шаруашылығымен айналысатын тұрғындар бұл мәселенің ауыл тіршілігі үшін аса маңызды екенін айтып, нақты шешімдер қабылдауды сұрады.

Кездесу соңында табиғи апаттан зардап шеккен тұрғынның мәселесі қаралды. Найзағай түсіп, меншігіндегі 21 бас ірі қара малы қырылған азаматқа елеулі материалдық шығын келгені айтылып, қолданыстағы заңнама аясында тиісті көмек көрсету және қолдау шараларын қарастыру мәселесі көтерілді.

Қоғамдық қабылдау барысында көтерілген барлық мәселелер аудан басшылығының бақылауында екені айтылып, әрбір өтініш заң аясында кезең-кезеңімен шешімін табатыны жеткізілді. Халықтың мұң-мұқтажына құлақ асып, нақты мәселелерді назарға алған мұндай кездесулер ел сенімін нығайтып, өңірдің дамуына серпін беретіні анық.

Созақ ауданында «Зорлық-зомбылықсыз Қазақстан» флешмобы өтті, деп хабарлайды QULAGER.KZ.

Аудан орталығында «Зорлық-зомбылықсыз Қазақстан» республикалық жедел-профилактикалық іс-шарасы аясында кең көлемді флешмоб ұйымдастырылды. Аталған шара Созақ ауданы әкімдігі мен аудандық полиция бөлімінің ұйымдастыруымен өтіп, қоғамда отбасылық құндылықтарды дәріптеу, әйелдер мен балалардың қауіпсіздігін қамтамасыз ету, сондай-ақ зорлық-зомбылыққа мүлдем төзбеушілік мәдениетін қалыптастыру мақсатында өткізілді.

18 мамыр мен 8 маусым аралығында өтетін республикалық іс-шара шеңберіндегі флешмоб ауданның Орталық стадионында ұйымдастырылып, оған мектеп оқушылары қатысты.

Іс-шарада аудан әкімінің орынбасары Алтын Күнтуқызы сөз сөйлеп, қоғамдағы тұрақтылық пен берекенің негізі – отбасындағы сенім мен сыйластық екенін атап өтті. Сонымен қатар, әрбір отбасында қауіпсіз орта қалыптастыру, әйелдер мен балалардың құқығын қорғау бағытындағы жұмыстардың маңыздылығына тоқталды.

Өз кезегінде Созақ аудандық полиция бөлімі басшысының орынбасары, полиция подполковнигі Нұрәділ Нұрланұлы отбасылық-тұрмыстық зорлық-зомбылықтың алдын алу бағытындағы жұмыстар құқық қорғау органдарының күнделікті назарында екенін айтып, тұрғындардың қауіпсіздігі мен қоғамдық тәртіпті сақтау басты міндеттердің бірі екенін жеткізді.

Шара барысында қоғам назарын зорлық-зомбылықтың алдын алуға аудару, жастар арасында құқықтық сауаттылықты арттыру және отбасылық құндылықтарды нығайту мәселелері кеңінен насихатталды.

Ордабасы ауданында ақпараттық-түсіндіру жұмыстары өтті, деп хабарлайды QULAGER.KZ.

Ордабасы ауданында халықтың құқықтық сауаттылығын арттыру, діни экстремизм мен радикализмнің алдын алу, сондай-ақ қоғамдық тұрақтылықты нығайту мақсатында ауқымды ақпараттық-түсіндіру шаралары өткізілді. Кездесулерге білім беру, денсаулық сақтау, жастар саясаты және әлеуметтік сала өкілдері қатысты.

Аталған шараға Ордабасы ауданы әкімінің орынбасары Олжас Болатханұлы, Түркістан облысы Дін істері басқармасының басшысы Рүстем Сабыржанұлы, Түркістан облысы Дін істері басқармасының «Дін мәселелерін зерттеу орталығы» КММ директоры Медет Халықов, орталықтың бөлім басшысы Қайрат Салықбаев, аудандық прокуратураның аға прокуроры Төлеметов Шыңғыс Қыдыралыұлы және аудандық ішкі саясат бөлімінің басшысы Әділ Пернебекұлы қатысып, түсіндіру жұмыстарын жүргізді.

Жиын барысында қоғамдық қауіпсіздік, заң талаптарын сақтау, интернет кеңістігіндегі қауіп-қатерлерден қорғану, жастар арасында жат діни ағымдардың таралуының алдын алу және дәстүрлі рухани құндылықтарды дәріптеу мәселелері кеңінен түсіндірілді.

Сонымен қатар, жастардың құқықтық сауаттылығын арттыру, сыни ойлау қабілетін дамыту және қоғамдағы тұрақтылықты сақтау бағытындағы жұмыстардың маңыздылығы айтылды.

Шара соңында қатысушылардың сұрақтарына жауап беріліп, құқықтық және діни бағыттағы арнайы жадынамалар таратылды.