Мақтаарал ауданындағы А-15 республикалық автомобиль жолындағы көпірдің құрылысы қарқынды жүргізілуде, деп хабарлайды QULAGER.KZ.

Түркістан облысы, Мақтаарал ауданындағы А-15 республикалық маңызы бар автомобиль жолының 2-шақырымында орналасқан көпірге күрделі жөндеу жұмыстары қарқынды түрде жүргізілуде. Аталған нысан аудан аумағындағы ең ірі елді мекендердің бірінде орналасқан және өңір тұрғындары үшін маңызды көлік инфрақұрылымының бірі саналады.

Жобаның жалпы ұзындығы 168,6 метрді құрайды. Оның ішінде көпірдің ұзындығы – 25,4 метр, ал жолдың ені – 9 метр. Инфрақұрылымдық жобаның жалпы құны – 358 миллион теңге.

Көпір құрылысындағы жұмыстардың барысымен танысу мақсатында «ҚазАвтоЖол» ұлттық компаниясының Түркістан облыстық филиалының директоры Ербол Пірімбетов арнайы жұмыс сапарымен Мақтаарал ауданына келді.

Сапар аясында ол мердігер мекеме – «TM-Bussine group» жауапкершілігі шектеулі серіктестігінің басшылығымен кездесіп, құрылыс жұмыстарының сапасы мен мерзімінде аяқталуына ерекше назар аудару қажеттігін атап өтті. Қазіргі таңда нысанда бірқатар маңызды жұмыстар толық орындалған. Атап айтқанда, жеңіл автокөліктердің қозғалысын үзбеу мақсатында уақытша айналма жол өткелі салынды. Сонымен қатар жол қауіпсіздігін қамтамасыз ету үшін қажетті жол белгілері орнатылып, инженерлік-коммуналдық желілердің орындары ауыстырылды. Бұдан бөлек ескі көпір құрылымдарын демонтаждау жұмыстары жүргізілді.

Бүгінде құрылыс алаңында жобалық-сметалық құжаттамаға сәйкес, көпірдің қадалы іргетасын дайындау жұмыстары жалғасуда. Атап айтқанда, арматуралық қаңқаларды тоқу, қажетті тереңдікте ұңғымаларды бұрғылау және бетон құю процестері атқарылуда. Бұл жұмыстар көпірдің беріктігі мен ұзақ мерзімді пайдаланылуын қамтамасыз етуге бағытталған.

Нысанда өндірістік кесте бойынша қажетті жұмысшы күші мен арнайы техникалар жеткілікті көлемде жұмылдырылған. Құрылыс жұмыстарының сапасы мен талаптарға сәйкестігі тапсырыс беруші мекеме, техникалық қадағалау мекемесі және ұлттық сапа орталығы тарапынан тұрақты әрі қатаң бақылауда.

Жауапты мамандардың мәліметінше, көпірді күрделі жөндеу жұмыстары өндірістік жоспарға сәйкес, биылғы жылдың соңына дейін толық аяқталып, пайдалануға беру көзделіп отыр.

Айта кетейік, аталған жоба өңірдегі көлік қатынасының қауіпсіздігін арттырып, тұрғындардың қатынау мүмкіндігін жақсартуға, сондай-ақ республикалық маңызы бар жол бойындағы көлік қозғалысының үздіксіз қамтамасыз етілуіне оң әсерін тигізеді.

Сарыағаш ауданындағы өндірістік парктің құрылысы қарқынды жүріп жатыр, деп хабарлайды QULAGER.KZ.

Түркістан облысында өңір басшысы Нұралхан Көшеровтің тапсырмасымен барлық аудан, қалада өндірістік парктер салынып жатыр. Мақсат – жұмыс орындарын көбейту. Бұл тірліктер Сарыағаш ауданында да атқарылып келеді. Сарыағаш ауданының әкімі Арман Абдуллаев өндірістік парк аумағындағы құрылыс жұмыстарының барысымен танысып, жүзеге асырылып жатқан жобалардың орындалу деңгейін зерделеді.

Жұмыс сапары барысында аудан басшысы инвесторлар мен мердігер мекеме өкілдерімен кездесіп, құрылыс нысандарындағы атқарылып жатқан жұмыстарды талқылады. Сонымен қатар жобаларды сапалы әрі белгіленген мерзімде аяқтау мәселесіне назар аударды.

Қазіргі таңда өндірістік аймақта орналасқан бірқатар кәсіпкерлік нысандардың ғимараттарына сыртқы әрлеу және қаптау жұмыстары жүргізіліп жатыр. Құрылыс алаңдарында қажетті инфрақұрылымдарды қалыптастыру бағытындағы жұмыстар кезең-кезеңімен жалғасу үстінде.

Айта кетейік, Түркістан облысында инвесторларды қолдау және жобалардың жедел жүзеге асырылуын қамтамасыз ету мақсатында арнайы экономикалық және индустриалды аймақтарда инженерлік инфрақұрылыммен қамтамасыз етілген дайын өндірістік алаңдар салынды.

Бүгінгі таңда арнайы экономикалық аймақтарда жалпы құны 976,4 млрд теңгеге, индустриялды аймақтарда 132,3 млрд теңгеге инвестициялық жобалар жүзеге асырылуда. Сонымен қатар аудандар мен қалаларда 214 гектар аумаққа шағын және орта бизнесті дамыту мақсатында 25 шағын өндірістік алаң құрылды. Бұл аймақтарда 192 млрд теңгенің инвестициялық жобалары іске асырылуда. Нәтижесінде, 5 218 жұмыс орны құрылмақ. Осы бастама аясында өңірдің барлық аудандарында 258 өндірістік ғимараттың құрылысы қарқынды жүргізіліп жатыр.

Түркістанда заң мен құқық саласындағы жетістіктер сараланған жиын өтті, деп хабарлайды QULAGER.KZ.

Түркістандағы «Достық» үйінде Қазақстан Республикасының Әкімшілік рәсімдік-процестік кодексінің қабылданғанына 5 жыл толуына орай дөңгелек үстел өтті. Жиынға облыстық соттың судьялары, мамандандырылған әкімшілік сот судьялары, прокуратура және құқық қорғау органдарының өкілдері, адвокаттар мен жеке сот орындаушылар, өңірлік департаменттер мен басқармалар басшылары, сондай-ақ Қожа Ахмет Ясауи атындағы халықаралық қазақ-түрік университетінің өкілдері қатысты.

Дөңгелек үстелді Түркістан облыстық сотының төрағасы Айдос Сұлтанов ашып, әкімшілік әділет саласының еліміздегі құқықтық жүйені жетілдірудегі маңызын атап өтті. Ол Әкімшілік рәсімдік-процестік кодекстің қабылдануы мемлекеттік органдар мен азаматтар арасындағы құқықтық тепе-теңдікті қамтамасыз етуге жол ашқанын айтты.

Түркістан облысының әкімі Нұралхан Көшеров құттықтау сөз сөйлеп, аталған заңның халықтың құқықтарын қорғаудағы және мемлекеттік басқару жүйесіндегі ашықтықты арттырудағы рөліне тоқталды.

– Баршаңызды Қазақстан Республикасының Әкімшілік рәсімдік-процестік кодексінің қабылданғанына 5 жыл толуымен шын жүректен құттықтаймын! Мемлекет басшысы Қасым-Жомарт Тоқаев әділетті Қазақстан құру жолында заң үстемдігін қамтамасыз етуге, адам құқықтарын қорғауға және мемлекеттік басқарудың ашықтығын арттыруға айрықша мән беріп келеді. Әкімшілік әділет институтының енгізілуі – осы стратегиялық бағыттағы аса маңызды қадамдардың бірі. Кодекс – азаматтардың құқықтары мен заңды мүдделерін қорғаудың нақты тетігін қалыптастыратын «Халық үніне құлақ асатын мемлекет» тұжырымдамасының нақты көрінісі. Әсіресе, «тыңдалу құқығы» қағидатының енгізілуі қандай да бір шешім қабылданар алдында азаматтың пікірі ескеріліп, уәжі тыңдалып, мәселені жан-жақты қарау тәжірибесін қалыптастырды. Өткен бес жыл ішінде Кодекстің қабылдануына орай, мемлекеттік басқару жүйесінде оң өзгерістер байқалды. Халық пен мемлекеттік орган арасындағы ашық диалог нығайды. Өтініштерді қарау сапасы артты. Мемлекеттік қызметшілердің жауапкершілігі күшейіп, азаматтардың сот органдарына сенімі арта түсті. Әрине, бұл жетістіктердің артында судьялардың, заңгерлердің, мемлекеттік қызметшілер мен құқық қорғау саласы мамандарының қажырлы еңбегі тұр. Сіздер заң үстемдігін қамтамасыз ету жолында аянбай еңбек етіп келесіздер. Осынау мерейлі күні баршаңызға зор денсаулық, толағай табыс және ел игілігі жолындағы қызметтеріңізге абырой тілеймін! Әділдік туы желбіреген Тәуелсіз Қазақстанымыз заң үстемдігі мен құқықтық мемлекеттің әлемдік озық үлгісіне айнала берсін! – деді Нұралхан Көшеров.

Маңызды жиында Түркістан облысының прокуроры Мұрат Тлеубердиев құттықтау сөз сөйлеп, әкімшілік әділет жүйесінің құқық үстемдігін қамтамасыз етудегі орнына назар аударды. Ал Қожа Ахмет Ясауи атындағы Халықаралық қазақ-түрік университетінің ректоры Жанар Темірбекова құқықтық білім мен ғылыми зерттеулерді дамыту мәселелеріне тоқталды.

Жиын барысында әкімшілік әділет саласының дамуына үлес қосқан бірқатар азамат марапатталды.

Дөңгелек үстелде әкімшілік әділет жүйесінің бес жыл ішіндегі жетістіктері, сот тәжірибесіндегі жаңашылдықтар, азаматтардың құқықтарын қорғаудағы тиімді тетіктер мен алдағы міндеттер кеңінен талқыланды. Қатысушылар әкімшілік соттардың қоғамдағы сенімді арттыру мен заң үстемдігін қамтамасыз етудегі рөлі жыл сайын күшейіп келе жатқанын атап өтті.