Әкімшілік әділет жүйесінің қалыптасқанына 5 жыл толуына орай Түркістан облыстық сотында студенттер үшін ашық есік күні өтті , деп хабарлайды QULAGER.KZ.
Қазақстан Республикасының әкімшілік рәсімдік-процестік кодексі 2020 жылғы 29 маусымда қабылданып, 2021 жылғы 1 шілдеден бастап Заңды күшіне енген.
Мемлекет Басшысының 2021 жылғы 26 қаңтардағы №500 жарлығына сәйкес Республика бойынша мамандандырылған әкімшілік соттар, сондай-ақ апелляциялық және кассациялық сатылардағы әкімшілік алқалар құрылып, 2021 жылғы 1 шілдеден Әкімшілік әділет жүйесі өз жұмысын бастады.
Биыл Президент Жарлығымен бекітілген Әкімшілік әділет жүйесінің қалыптасқанына 5 жыл толып отыр.
Осыған орай, бекітілген іс-шаралар жоспарына сәйкес болашақ заңгер мамандығы бойынша білім алушыларға арналған ашық есік күні өткізілді.
Ашық есік күніне Қ.А.Ясауи атындағы Халықаралық қазақ-түрiк университетiнің, «Түркістан Ахмет Ясауи» кәсіби колледжінің жәнеТүркістан Болашақ көпсалалы колледжінің студенттері қатысты.
Облыстық сот төрағасы Айдос Сұлтанов студенттерге заң мамандығының ерекшелігіне тоқталып, өз тәжірибесімен бөлісті.
Ашық есік күні – тек таныстыру іс-шарасы ғана емес, студенттердің болашақ мамандықтарына жақындауына жол ашқан маңызды кездесу болды.