Кентаулық көпбалалы аналарға төсбелгілер табысталды, деп хабарлайды QULAGER.KZ.
Кентау қаласында көпбалалы аналарды марапаттау рәсімі өтіп, 10 ана төсбелгіге ие болды. Оның ішінде, 3 ана «Алтын алқа» иегері атанса, 7 анаға «Күміс алқа» табысталды. Бұл марапаттар — көпбалалы аналардың ел болашағын тәрбиелеудегі өлшеусіз еңбегіне берілген жоғары баға.
Салтанатты жиында қала әкімінің орынбасары Бауыржан Әбенұлы марапаттарды табыстап, аналарды құттықтады. Ол отбасы құндылықтарын нығайтуда, ұрпақ тәрбиесінде және елдің демографиялық өсімін қамтамасыз етуде аналардың еңбегі зор екенін жеткізді. Айта кетсек, жыл сайын Мемлекет басшысының Жарлығына сәйкес, жеті және одан да көп бала тәрбиелеп отырған аналар «Алтын алқа», ал алты бала дүниеге әкелген аналар «Күміс алқа» мемлекеттік наградаларымен марапатталады.