Өндірістік кәсіпорындарда химиялық уланудың алдын алу – жұмысшылардың денсаулығын қорғауға және зиянды химиялық заттардың адам ағзасына әсерін болдырмауға бағытталған маңызды шаралар жүйесі. Өндіріс орындарында әртүрлі химиялық заттар қолданылатындықтан, олардың адам ағзасына түсу қаупі жоғары болуы мүмкін. Сондықтан өндірістік процестерді қауіпсіз ұйымдастыру, улы және зиянды заттарды дұрыс сақтау, тасымалдау және пайдалану өте маңызды. Өндірістік жабдықтарды герметизациялау, технологиялық процестерді автоматтандыру және механикаландыру жұмысшылардың химиялық заттармен тікелей байланысын азайтады.
Сонымен қатар өндіріс орындарында тиімді желдету жүйелері (жалпы және жергілікті) орнатылып, жұмыс аймағындағы ауадағы зиянды заттардың концентрациясы тұрақты түрде бақылауда болуы тиіс. Қауіптілігі жоғары химиялық заттарды мүмкіндігінше уыттылығы төмен заттармен алмастыру да химиялық уланудың алдын алудың маңызды жолдарының бірі болып табылады.
Сонымен бірге жұмысшылар жеке қорғаныш құралдарын міндетті түрде қолдануы керек: респираторлар, газқағарлар, қорғаныш көзілдіріктері, арнайы киімдер және аяқ киімдер, қолғаптар. Бұл құралдар зиянды химиялық заттардың тыныс алу жолдары, тері немесе көз арқылы ағзаға түсуін азайтады. Санитарлық-гигиеналық талаптарды сақтау да үлкен маңызға ие: жұмыс орнында тамақтанбау, химиялық заттармен жұмыс аяқталғаннан кейін қолды сабынмен жуу, душ қабылдау және арнайы тұрмыстық бөлмелерді пайдалану қажет. Өндірістік ғимараттарда тазалық сақталып, қауіпті заттардың төгілуі немесе шашырауы болған жағдайда оларды дереу залалсыздандыру жұмыстары жүргізілуі тиіс.
Қызметкерлерге еңбек қауіпсіздігі және техника қауіпсіздігі бойынша тұрақты түрде нұсқаулық өткізіліп, олардың білімдері тексеріліп отырады. Сонымен қатар, алдын ала және мерзімдік медициналық тексерулер жүргізіліп, жұмысшылардың денсаулық жағдайы бақылауда болады. Өндірісте төтенше жағдайлардың алдын алу үшін апаттық желдету жүйелері, алғашқы медициналық көмек құралдары және арнайы қауіпсіздік белгілері болуы тиіс.
Қорытындылай келе, өндірістік кәсіпорындарда химиялық уланудың алдын алу үшін ұйымдастырушылық, техникалық, санитарлық-гигиеналық және медициналық шараларды кешенді түрде жүзеге асыру жұмысшылар үшін қауіпсіз және қолайлы еңбек жағдайын қамтамасыз етеді.
Түркістан облысы санитариялық-эпидемиологиялық бақылау департаментінің басшы орынбасары Искаков Аскар