Конституциялық жаңғыру — Қазақстанның даму жолындағы жаңа кезеңге қадам басуы. Ұсынылып отырған өзгерістер мемлекеттің басқару жүйесін жетілдіруге ғана емес, ең алдымен, азаматтардың құқықтық мәдениетін арттыруға және қоғамдағы әділдік қағидатын нығайтуға бағытталған.
Реформаның басты басымдықтарының бірі — мемлекеттік биліктің ашықтығы мен қоғамдық бақылау тетіктерін күшейту. Конституциялық деңгейде азаматтардың ақпаратқа қол жеткізу құқығы, мемлекеттік органдардың есеп беру міндеттемелері және қоғамдық кеңестердің рөлі нақты бекітіледі. Бұл халық пен билік арасындағы диалогтың жаңа сапалық деңгейге көтерілуіне мүмкіндік береді.
Халыққа тікелей пайда әкелетін тағы бір маңызды бағыт — экономикалық құқықтардың қорғалуын күшейту. Жеке меншікке қол сұқпаушылық, кәсіпкерлік қызмет еркіндігі және адал бәсекелестік қағидаттарының конституциялық деңгейде бекітілуі инвестициялық ахуалды жақсартуға, жаңа өндірістер мен жұмыс орындарын ашуға негіз қалайды. Бұл, өз кезегінде, өңірлердің экономикалық белсенділігін арттырып, тұрғындардың табыс деңгейіне оң әсер етеді.
Әлеуметтік салада реформаның нәтижесінде мемлекеттік қолдаудың әділ әрі мақсатты түрде көрсетілуі заңнамалық тұрғыдан нақтыланады. Денсаулық сақтау, білім беру, тұрғын үймен қамту және әлеуметтік көмек салаларындағы мемлекеттік міндеттемелердің айқындалуы халықтың әлеуметтік қауіпсіздігін қамтамасыз етуге бағытталған.
Жергілікті басқару жүйесінде өңірлердің дербестігін арттыру және мәслихаттардың жауапкершілігін күшейту маңызды өзгерістердің бірі болып отыр. Бұл аймақтардың өз даму басымдықтарын айқындауға, инфрақұрылымдық және әлеуметтік жобаларды жергілікті ерекшеліктерді ескере отырып жүзеге асыруға мүмкіндік береді.
Осы тұрғыдан алғанда, Конституциялық жаңғыру — бұл азаматтардың мүддесіне негізделген, әлеуметтік тұрақтылықты, экономикалық өсімді және құқықтық тәртіпті қамтамасыз етуге бағытталған кешенді мемлекеттік саясаттың маңызды құрамдас бөлігі. Біз бұл бастаманы қолдай отырып, оның еліміздің болашағына, өңірлердің дамуына және халықтың әл-ауқатының артуына берік негіз қалдыратынына сенім білдіреміз.
Уалихан Рахиев,
Түркістан облыстық мәслихатының депутаты.