Конституциялық комиссия Қазақстанның жаңа Конституциясының бірінші жобасын дайындады. Жобасын дайындау кезінде соңғы 6 айда келіп түскен азаматтардың, қоғамдық ұйымдар, саяси партиялар мен сарапшылардың ұсыныстары, сондай-ақ Комиссия мүшелерінің пікірлері, ескертулері мен ұсынымдары ескерілген.
Қазақстанның жаңа Конституциясының алғашқы жобасы Преамбуладан, 11 бөлімнен және 95 баптан тұрады. Жобаға ұсынылған нормалар Ата заңның барлық бөлімін қамтып, 77 бапқа түзетулер енгізу ұсынылған. Бұл Конституция мәтінінің 84 пайызын құрайды.
49-бап Вице-Президенттің құқықтық мәртебесі мен өкілеттіктеріне арналады. Бір палаталы Парламент моделіне арналған нормалар төртінші «Құрылтай» деген бөлімде жинақталды. Онда заң шығару органының өкілеттіктері бекітілген. Сонымен қатар, Қазақстанның сыртқы саясатының бастаулары өзектендірілді.
Адвокатураның құқықтық мәртебесі Конституцияда алғаш рет бекітіледі. «Сот төрелiгi. Прокуратура. Құқық қорғау тетіктері» деген келесі бөлімге сот билігіне, прокуратура органдарына, Адам құқықтары жөніндегі уәкілге, адвокаттарға және заң көмегін көрсететін өзге тұлғаларға қатысты ережелер енді. Жаңа Конституция мәтінінде Қазақстан Республикасының азаматында қос немесе көп азаматтықтың болуына жол берілмейтіні анық жазылған. Конституцияға түзету енгізу тек жалпыхалықтық референдум арқылы жүзеге асады. Конституцияның жобасында жалпыхалықтық референдум өткізу туралы Президентке ұсыныс енгізетін субъектілердің қатарына қосымша Қазақстан Халық Кеңесін қосуды көздейтін норма қарастырылған.
Жалпы, Конституциялық комиссия жұмысына барлық өңірлердің мәслихат төрағалары қатысып, Конституция жобасын әзірлеуге атсалысты. Мен Түркістан облысының мәслихат депутаты ретінде бұл жағдайды мәслихаттардың ел басқарудағы және маңызы бар шешімдер қабылдаудағы рөлін айқын көрсетті деп ойлаймын. Осы ретте, Мәслихаттардың қоғамдық-саяси өмірде, елдің құқықтық құрылымын қалыптастыруда орны ерекше деп айтуға болады.
Түркістан облыстық мәслихат депутаты, Мырзахан Манапов