Түркістан қаласында да қоршаған ортаны қорғау бағытында кешенді және жүйелі жұмыстар жүргізіліп келеді, деп хабарлайды QULAGER.KZ.
Бүгінде дүниежүзілік проблемаға айналған тақырыптың бірі – қоршаған ортаны қорғау. Себебі, жер бетінде адамзат саны көбейіп, өндіріс артқан сайын табиғатқа кері әсерін тигізіп, экологиялық ахуалды төмендететін жағдайлар жиі орын алуда. Осы ретте руханият пен мәдениеттің орталғы саналатын Түркістан қаласында да қоршаған ортаны қорғау бағытында кешенді және жүйелі жұмыстар жүргізіліп келеді. Бұл іс-шаралар қаланың экологиялық жағдайын жақсартуға, тұрғындар үшін қолайлы орта қалыптастыруға және тұрақты даму принциптерін жүзеге асыруға бағытталған. Аталған саладағы жұмыстарды бірнеше бағытқа бөліп қарастыруға болады:
«Таза Қазақстан» экологиялық акциясы
Мемлекет басшысы Қасым-Жомарт Тқаевтың бастамасымен қарқын алған бұл акция Түркістан қаласында тұрақты әрі белсенді түрде жүзеге асырылып келеді. Жыл сайын, тіпті апта сайын көктем және күз мезгілдерінде жалпықалалық сенбіліктер ұйымдастырылып, қала аумағынан мыңдаған тонна қоқыс шығарылады. Сонымен қатар, акция барысында ағаш көшеттері отырғызылып, күл-қоқыс тазаланады, жасыл белдеулер аумағы кеңейтіліп, біршама нысан абаттандырылады. Мәселен, 2024 жылы аталған жұмыстарға қаладағы 1000-нан аса мекеме мен ұйымдар, мыңдаған тұрғын мен еріктілер қатысып, қала тазалығына, қоршаған ортаны қорғауға өз үлестерін қосқан.
Көгалдандыру және жасыл аймақтарды кеңейту
Бірнеше жылдан бері Түркістан қаласының айналасында аумағы 8000 гектарға жуық орман белдеуі қалыптасып келеді. Соңғы жылдары қала аумағында жүздеген мың ағаш көшеттері мен гүлдер отырғызылып, саябақтар мен скверлер ашылып, бұрыннан бар нысандар жандана түскен. Сәйкесінше, «Жасыл Түркістан» коммуналдық мемлекеттік мекемесі тарапынан күнделікті суару, санитарлық тазалық, тыңайту жұмыстары жүйелі түрде жүргізілуде. Қала ішінде «жасыл аймақтар картасы» әзірленіп, көгалдандыру жұмыстары сол картаға сай жүргізілуде.
Ауаның ластануын бақылау
Қазіргі таңда Түркістан қаласында экологиялық мониторинг жүйесі дамып келеді. Ауа сапасын бақылау бекеттері орнатылып, көлік қозғалысының әсері зерттелуде. Сонымен қатар, экобекеттер арқылы қалдықтарды бөліп тастау және қайта өңдеу жұмыстары қолға алынған.
Қалдықтарды басқару
Түркістан қаласында тұрмыстық қалдықтарды жинау, тасымалдау және қайта өңдеу жұмыстары жолға қойылған. Алдағы уақытта жаңа қоқыс полигондары мен сұрыптау кешендерін салу жұмыстары жоспарланып отыр. Мәселен, салынуы жоспарланған жаңа қалдық өңдеу кешені – қоқысты сұрыптап, қайта өңдеп, тыңайтқыш немесе құрылыс материалдары ретінде пайдалануға мүмкіндік береді. Одан бөлек, экологиялық білім беру бағытында мектептерде және балабақшаларда арнайы сабақтар өткізіліп жатыр.
Су ресурстарын қорғау
Түркістан қаласының аумағында су арналары мен каналдар бар. Осы ретте аталған нысандарды тазарту жұмыстары тұрақты түрде жүргізілуде. Су үнемдеу технологиялары да көптеп енгізіліп, ирригациялық жүйелер жаңартылу үстінде. Алдағы уақытта қаланы көгалдандыру үшін қайта пайдалануға болатын тазартылған су жүйесі енгізілуі мүмкін (грейуотер жүйесі). Сонымен бірге жер асты су көздерінің картасы әзірленіп, оларды қорғау шаралары қолға алынуда.
Қаланың экологиялық төлқұжаты
Түркістан қаласында қоршаған ортаны қорғауға арналған экологиялық паспорт жасақталған. Бұл құжатта табиғи ресурстар, экологиялық жағдай және қалдықтарды басқару көрсеткіштері жүйеленіп, даму жоспары негізделеді.
Экоағарту және экотуризм
Түркістан қаласындағы мектептер мен жоғары оқу орындарында экология пәні мен экоакциялар белсенді түрде жүргізілуде. Қала маңындағы экологиялық таза аймақтарда эко-туризмді дамыту бойынша бастамалар қолға алынған (мысалы, табиғат аясындағы демалыс аймақтары мен велосипед жолдары).
Цифрлық бақылау
Қазір ақпараттық технологияның дамыған заманы. Осыған орай Түркістанда цифрлық экология жүйесі енгізілуде. Бұл жүйе арқылы ағаш отырғызу, суару, тазалық сынды жұмыстарды онлайн бақылауға мүмкіндік болады. Қала әкімдігі арнайы экопортал ашып, тұрғындарға экология мәселелері бойынша хабар беру және кері байланыс орнатуға мүмкіндік жасауда.
Қорыта келе, Түркістан қаласында қоршаған ортаны қорғау бағытындағы жұмыстар жоспарлы, бағдарламалық және халықты кеңінен жұмылдыра отырып жүргізіліп жатыр деп сеніммен айта аламыз. Экологиялық мәдениетті қалыптастыру мен қаланың жасыл келбетін арттыру – басым бағыттардың бірі.