Түркістан қаласында туризм саласын дамыту мақсатында соңғы жылдары бірқатар ірі жобалар жүзеге асырылды, деп хабарлайды QULAGER.KZ.
Түркістан қаласында туризм саласын дамыту мақсатында соңғы жылдары бірқатар ірі жобалар жүзеге асырылды, іске асырылып жатқандары да баршылы. Бұл бастамалар қаланы халықаралық деңгейдегі рухани-мәдени және туристік орталыққа айналдыруға бағытталған.
Атап айтқанда, негізгі жобалар мен нысандар мыналар:
2021 жылы Керуен-Сарай туристік кешені іске қосылды. Көне Шығыс стилінде салынған бұл кешен аз ғана уақыт ішінде Түркістанның жаңа символына айналды. Кешен аумағында суда жүзетін театр, ұшатын театр шығыс базары, қонақ үйлер, сауда орындары мен тарихи-мәдени көрмелер бар. Бұл Орталық Азияда баламасы жоқ, су арнасы бар кешен.
Жаңғыртылған «Әзірет Сұлтан» тарихи-мәдени қорық-мұражайы. Қожа Ахмет Ясауи кесенесінің айналасы қайта абаттандырылып, зираттық кешендерге апаратын жолдар, инфо-тақталар, жарықтандыру жүйесі жаңартылды.
«Түркістан Арена» стадионы – 7 мың орынды заманауи спорт кешені. Спорттық туризмді дамытуға ықпал етері сөзсіз.
Түркі әлемі орталығы – түркі халықтарының тарихын, мәдениетін насихаттайтын интерактивті музей. Бүгінде мұнда халықаралық деңгейдегі ғылыми, мәдени форумдар өткізілуде.
Қаладағы амфитеатр мен концерт залдары мәдени туризмді дамыту мақсатында ашылған. Қазіргі таңда қалада тұрақты түрде халықаралық фестивальдер мен концерттер ұйымдастырылады.
Қожа Ахмет Ясауи атындағы Ислам академиясы – діни, тарихи, рухани туризммен байланысты зерттеу және білім орталығы.
Қонақ үй және көлік инфрақұрылымы: 2020 жылы жаңадан Түркістан халықаралық әуежайы ашылды; Hilton Garden Inn, Hampton by Hilton, Rixos және т.б. халықаралық стандарттағы қонақ үйлер салынды; қаланың көлік желісі мен автожолдары кеңейіп, туристерге ыңғайлы жағдай жасалды.
Туристік бағыттар мен маршруттар: Ziyarat (зиярат) туризмі бойынша арнайы «Арыстан баб – Отырар – Сауран – Түркістан» бағыттары жасақталған; Гидтер мен ақпараттық жүйелер цифрлық форматта ұсынылуда.
Ел үкіметі Түркістанды 2030 жылға дейін «смарт-рухани қала» ретінде дамыту жоспарын қолға алған. Бұл бағытта туризммен қатар, мәдениет, көлік, экология, цифрландыру салаларында да жобалар іске асуда. Жалпы, қаланың туристік әлеуеті жылдан жылға артып келеді.