Енді 147 мың теңгеден, 3 айдан астам өтелмеген қарызы барлар қазақстандықтарға жол жүру шектеледі, деп жазады Stan.kz.

Бас прокуратураның, Әділет және Денсаулық сақтау министрліктерінің, Ұлттық қауіпсіздік комитеті Шекара қызметінің, Жеке сот орындаушыларының республикалық палатасының өкілдері қатысқан жиында осы мәселені талқылады.

“Әдетте, 147 мың теңгеден (40 АЕК) 3 айдан астам өтелмеген қарызы барларға жол жүру шектеледі. Шетелге шығуға шектеулердің тоқтатылуының жалғыз себебі — шетелде емделу қажеттілігі.Алайда талдау нәтижелері көрсеткендей, биылғы 10 ай ішінде сотқа жіберілген 1 768 қаулының 867-сі немесе әрбір екіншісіне санкция беруден бас тартылған. Рұқсат беруден бас тарту шетелде емделу қажеттілігі туралы дәлелдердің болмауына және өз елінде емделу мүмкіндігінің болуына байланысты”, — делінген хабарламада.

Деректерге сүйенсек, көбіне қарызы бар қазақстандықтар шетелге шығу үшін елімізде сәтті емделетін (остеохондроз, гастрит, артрит, пульпит және т.б.) ауруларын сылтау еткен. Сот орындаушылары заңда көзделмеген негіздер бойынша (қызметтік іссапарлар, жарыстарға қатысу, жақын туыстарын жерлеу және т.б.) жол жүруге уақытша шектеулерді тоқтату туралы қаулылар шығару жағдайларына жол берген. Ал енді 40 АЕК немесе 147 мың теңгеден, 3 айдан астам өтелмеген қарызы барларға жол жүру шектеледі.

Мәжіліс депутаттары есірткі, психотроптық заттар мен прекурсорлардың заңсыз айналымына қарсы заңнама бойынша өзгерістер мен толықтыруларды екінші оқылымда қабылдады, деп жазады Sputnik Қазақстан.

Қылмыстық кодекске есірткі, психотроптық заттарды, сол тектестерді өткізу мақсатында заңсыз дайындау, қайта өңдеу, өндіру үшін жауаптылықты көздейтін жаңа 297-1-бабы енгізіліп отыр.

Жазасы – мүлкі тәркіленіп он бес жылдан жиырма жылға дейін немесе өмір бойына бас бостандығынан айыру. Ал 297-бабында есірткі заттарды өткізу мақсатында заңсыз иемдену, сақтау, тасымалдау, жөнелту не өткізу үшін бес жылдан сегіз жылға дейін бас бостандығынан айыру жазасы болады. Бұған дейін бес жылдан он жылға дейінгі жаза қолданылған. Ал ірі мөлшерде жасалған дәл сол іс-әрекеттер үшін алты жылдан он жылға дейін (бұрын алты жылдан он екі жылға дейін болған) бас бостандығынан айыру түріндегі жаза көзделген.

«Лауазымды адам қызмет бабын пайдаланып жасаған дәл сол іс-әрекеттер үшін он бес жылдан жиырма жылға дейінгі мерзімге (бұрын он жылдан он бес жылға дейін болған) бас бостандығынан айыру түріндегі қылмыстық жауаптылық көзделген»,-делінген заң жобасының қорытындысында.

Бұдан бөлек, есірткілерді таратқаны үшін жауаптылықты күшейту мақсатында мүлікті тәркілеу түріндегі санкция да қолданылады.

Қарашық ауылында жаңа тігін цехы ашылып, аудан тұрғындары үшін жаңа жұмыс орындары пайда болды. Цехтың ашылуына аудан әкімі Мақсат Таңғатаров пен облыстық мәслихат депутаты Инара Абдығаппарқызы, аудандық мәслихат депутаты Нұрсұлтан Абдуллаев арнайы қатысып, көпшілікке жылы лебіздерін білдірді. Жоба Сауран ауандық іскер әйелдер қауымдастығының төрайымы Дильназ Омарованың ұйымдастыруымен жүзеге асты.

Жаңа өндіріс орнының ашылуы ауыл экономикасының дамуына үлкен үлес қосатыны сөзсіз. Аудан әкімінің айтуынша, бұл жоба ауыл тұрғындарының әлеуметтік жағдайын жақсартуға, әсіресе жастар мен әйелдер үшін жұмыс орындарын ашуға бағытталған. Мақсат Таңғатаров цехтың алдағы уақытта өнім көлемін арттырып, өңірлік нарықта сұранысқа ие болатынына сенім білдірді.

Облыстық мәслихат депутаты Инара Абдығаппарқызы жаңа цехтың ашылуы облысымыздағы кәсіпкерліктің дамуына ықпал ететінін атап өтіп, бұл секілді бастамаларды қолдауға дайын екендігін айтты. Ол сонымен қатар, өндіріс орындары ашылу арқылы қолөнер саласында да жаңа мүмкіндіктер туындайтынын жеткізді.

Жаңа тігін цехы жергілікті тұрғындар үшін тек жұмыс көзі ғана емес, сонымен қатар әлеуметтік және экономикалық тұрғыдан аймақтың дамуына оң әсер ететін жоба болмақ. Цех жұмысының алғашқы кезеңінде 20 адам тұрақты жұмысқа алынды, ал алдағы уақытта жұмыс орындарының санын көбейту жоспарлануда.

Алматы қаласының кіреберісінде орналасқан «Асыл Арман» тұрғын үй кешенінің аумағында оқушыны автобус басып кетті, деп жазады kaz.inform.kz.

Оқиға салдарынан 7 жасар бала қайтыс болды. Бұл деректі Алматы облысының Полиция департаменті растады.

“ 27 қарашада JAC автобусының жүргізушісі «Асыл Арман» тұрғын үй кешенінің тұрақ аумағында артқа жүрген кезде 7 жасар баланы қағып кеткен. Ол алған жарақаттарынан оқиға орнында көз жұмды. Қазіргі уақытта сотқа дейінгі тергеу жүргізіліп жатыр”, — деп хабарлады облыстық ПД баспасөз қызметі.